ယာဉ်ပျံကြီး စီးပြီး ရောက်လာတယ်

တစ်ခုခုဆို မြို့ပြင်ဖက် ထွက်ကြည့်တတ်ကြလို့
မြို့ပြင်ဖက် ရွေးဆင်းခဲ့တာ
အ အာ အိ အီ နဲ့ပဲ နှုတ်ခွန်းဆက်ရတယ်
ဒါတောင် ဂွီဂွီ ဂေါင်ဂေါင်တွေ မပြောရသေးဘူး
လယ်ကန်သင်းရိုးပေါ် လေချွန် လမ်းလျှောက်
မြက်ခင်းနဲ့ မြေသားကို ကိုင်တွယ်စမ်းသပ်ကြည့်
ကျွဲတွေကြားထဲ ရွှံ့ရေ ၀င်လူး
ကမ္ဘာမြေဟာ တယ် အရသာရှိပါလား
ကင်မရာလေးထုတ်ပြီး တဖျပ်ဖျပ် တချပ်ချပ်
မြင်သမျှမှတ်တမ်းတင်ရ ပြန်ရောက်ရင်
ရီပို့တင်ဖို့ ဖတ်ညွှန်းရေးဖို့
ဒီလိုနဲ့ မီဒီယာတွေ ၀ိုင်းမလာခင်
ထန်းရည်သောက် ကျူရိုးဦးထုပ်လေးဆောင်းပြီး
တနင်္ဂနွေနေ့က ပြန်ခဲ့တယ်။

ပိုင်မင်းဆွေ

(၈ ဂျူလိုင် ၂၀၁၀)

ပွန်းပဲ့နေတဲ့ငှက်တစ်ကောင်

အပြင်မှာ

မှောင်တော့မယ် ညီမလေးရေ။

ခုလိုညနေခင်းတွေဆို
ခိုကိုးရာမဲ့ငှက်တွေကို အစာချကျွေးရင်း
ကိုယ့်ညီမလေးလည်း
လောကကို တစ်ဆုံးတွေးနေတော့မယ်။

အေးကွာ
မြို့ကြီးပြကြီးဆိုတာလည်း
တောကြီးမျက်မည်းလိုပါပဲ
လမ်းမနဲ့တူတဲ့ကိုယ့်ဘ၀ကို
ငုံ့ကြည့်ပြီး လျှောက်တာတောင်
လမ်းပျောက်လိုပျောက်
သစ်ပင်နဲ့တူတဲ့ လူရဲ့အောက်မှာရပ်ရင်း
မျက်လုံးနဲ့မတူတဲ့ အကြည့်တွေကို ရှောင်ဖယ်ရင်း
ကိုယ့်ညီမလေးချကျွေးတဲ့
အစာဗန်းလေးထဲမှာ
ငှက်တစ်ကောင်ဖြစ်ချင်ပါတယ်။

အခုလို အမှောင်တွေ တရစ်ချင်းဆင်းလာပြီဆို
ကိုယ့်ကိုယ်ကို ညဥ့်နက်ထားရတဲ့နေ့တွေဟာ
ခေါင်းပေါ်ကဆံပင်တွေလို ရှည်လျားဆဲ
ဒုက္ခဆိုတာကလည်း
တစ်ခါတစ်လေ ဖီးသင်သပ်ရပ်လိုက်
တစ်ခါတစ်လေ ရှုပ်ထွေးပွယောင်းလိုက်မဟုတ်လား
ငှက်တွေအိပ်တန်းဝင်ကြပြီ ညီမလေးရေ
"ငါလည်းဒီည ဘယ်အကိုင်းမှာနားမလဲ"
အတွေးထူထူ တိရစ္ဆာန်ရုံနဲ့တူတဲ့
ဆူဆူညံညံ အရက်ဆိုင်လေးထဲက ထွက်လာခဲ့တယ်။

ကဲ . . .
လောကကို ခပ်မော့မော့ကြည့်တတ်တဲ့ ကိုယ့်ညီမလေးရေ
မိုးတွေလည်းမှောင်လာပြီ
မင်းအခန်းတံခါးကို ပိတ်လိုက်တော့
မင်းစာဖတ်ချိန် ၊ မင်းအိပ်ချိန်
ပြီးတော့ မင်းအိပ်မက်တွေထဲ
ခေါင်းငိုက်စိုက် ပျံသန်းလာတဲ့ငှက်တစ်ကောင်
ခပ်တိုးတိုးပေါက်ကွဲရင်း
လမ်းလျှောက်နေတာတွေ့ရင်လည်း
မင်းသိထားတဲ့ အဘိဓမ္မာတွေ ၊ ဒိုင်ယာလော့တွေနဲ့
ငါ့ဘ၀ထဲ ချကျွေးပါအုံးကွာ ။

ဝင်းမြင့်

ငါ့ရဲ့အခင်းအကျင်း

ငါ့အရိုးတွေအကြောင်း ငါမပြောနိုင်
ငါ စိတ်လိုလက်ရရှိတုန်းကတော့
ငါ့ကိုယ်ထဲ ငါစမ်းကြည့်
ငါ့သွေးကြောထဲမှာ ချောက်နက်နက်တစ်ခုရှိတယ်
အဲဒီချောက်ထဲသို့ ငါလွှတ်လိုက်တဲ့ စာပို့ခိုတွေ
ငါ့ဆီတစ်ကောင်မှ ပြန်ရောက်မလာဖူးဘူး
တကယ်တော့ ငါ့အကြောင်းဟာ ပျင်းရိဖွယ်ပါ
ငါ့စိုက်ခင်းမှာ ထူးဆန်းတာဘာမှမရှိ
ငါ့မသိမှုတွေသာ ကိုင်းဆက် အသီးမြန်ခဲ့ရ
မျက်လုံးဝင်းဝင်းများနဲ့ မင်းကိုငါချစ်တယ်ဆိုပြီး
ကြာသပတေးညတွေမှာ ငါ ထထယောင်မယ်
ခေတ်နဲ့ ရင်းရင်းနှီးနှီးရှိတဲ့ ငါ့မီးတွေ
မြန်နှုန်းမြင့်မြင့် ထထလောင်မယ်
ဘီယာဆိုင်သွားရင်း ကေတီဗွီထိုင်ရင်း
ငါ လှလှပပ အရွယ်ရောက်လာတာဟာ
ငါ့ကိုဖမ်းမယ့် ငါ့ထောင်ချောက် ပိရိသေသပ်တာလို့ခေါ်တယ်
ဘွဲ့တွေရ လခတွေရ ဘယ်လောက်သေသပ်သလဲ
ဟိုဟာတွေငါပိုင် ဒီဟာတွေငါဆိုင်
ငါ့ဖြတ်လျှောက်ဇာတ်ဝင်ခန်းဟာ ကြေးကြီးလာခဲ့
ငါဟာမိန်းမော ငါဟာမျော ဒီလိုဆို
မဖြစ်သေးဘူး ငါအချီကြီးခုတ်ပိုင်းမိတော့မယ်
ငါ့ကြောက်စိတ်တစ်ပတ်ပြန်လည် ငါ့ကြေးစည်သံငါကြားမိ
ငါ့မွေးနေ့မှာ ငါ့ကိုယ်ငါ သွေးအေးအေး ဖြုတ်ပစ်တယ်
ငါဟာ ငါ့ပြုတ်ထွက်လက်နှစ်ဖက်ကို ကြည့်ပြီး ရယ်တယ်
ငါ့ပဲ့ကွာခြေထောက်နှစ်ချောင်းကို ကြည့်ပြီး မောတယ်
အခု ငါ့ကိုယ်ကောင်ဟာ ငါ့ညစာ
ငါ့ဦးခေါင်းက ၀ါးလုံးကွဲဟာသပဲ
ငါ့မျက်လုံးနဲ့ငါ့နားရွက်တွေကို ကိုင်ကြည့်နေတဲ့
ငါ သို့မဟုတ် ငါး
(ယနေ့ထိ) ငါ့ကိုဘာနဲ့မျှားမျှား
ငါတို့ မိမြဲမိတယ်။

ပိုင်မင်းဆွေ

( ၂၀ ဂျူလိုင် ၂၀၁၀)
၎း၁၁-၅း၀၀-၅း၂၄ မနက်။



*ကဗျာဆရာအောင်ပိုင်စိုးရဲ့ Poet's Choice အစီအစဉ် စာမူတောင်းတုန်းက ဒီကဗျာလေးကို ပေးခဲ့မိတယ်။
ဒီလင့်များမှာ သွားရောက်ဖတ်ရှုနိုင်ပါတယ်။

>>Poet's Choice by Pi Min Swe
>>ငါ့ရဲ့အခင်းအကျင်း

လက်ထပ်ပွဲ

တိမ်ပြာသော နေ့တစ်နေ့မှာ
ရောင်စုံပူပေါင်းများနဲ့ သတို့သမီး
ယာဉ်ပျံကြီးစီးပြီး ရောက်လာပြီ
ဒါဟာ ဂြိုလ်သစ်တစ်ခုတွေ့ရှိခြင်းပါတဲ့
သူမ ပြုံးထားတယ်
ဓာတ်ပုံရိုက်ပေးမယ့်သူ မရှိဘူး
လက်ခုပ်သံနဲ့ ပိုးသားဝတ်စုံ မရှိဘူး
အနာတရ မိုးတိမ်တွေ ဆင်ယင်၍ပဲ
ကာဆယ်နဲ့မြင်းကို ထိုးကျွေး၍ပဲ
ခန်းမထဲ တိတ်တဆိတ် လှမ်းလာတယ်
အလာတုန်းက ယာဉ်ပျံကြီး
ပေါက်ကွဲ ပျက်စီး သွားခဲ့ပြီ။

ပိုင်မင်းဆွေ
( ၂ ဂျူလိုင် ၂၀၁၀)

ပြန်လာသူ

သူ့ကို သေချာထုပ်ပိုးပြီး
လက်ဆောင်ပစ္စည်းတစ်ခုလို ပြန်ပို့လိုက်ကြတယ်။

အထုပ်ကို ဖြေလိုက်တော့
မြင်သူအားလုံး လန့်သွားကြတယ်
သူ့တစ်ကိုယ်လုံး ချုပ်ရိုးတွေနဲ့။

ဘာဖြစ်ခဲ့တာလဲ
ကရုဏာနဲ့ မေးသူမေး
သူ့နှုတ်ခမ်းတွေပါ ဘယ်လိုလက်လွန်ချုပ်မိသွားလဲမသိဘူး။

သူ့မျက်လုံးတွေထဲမှာ
မျက်ရည်တွေဝဲလို့ --
သူ့မှတ်ဉာဏ်ရဲ့ ချုပ်ရိုးတွေထဲမှာ
မှောင်မိုက်ညပဲ။

သူ့ကို ထုပ်ပိုးခဲ့တဲ့
အရောင်တောက်တောက်
အဆင်လှလှ
ကိုင်လိုက်ရင် ကြွပ်ကြွပ်မြည်တဲ့
ထုပ်ပိုးစက္ကူကိုသာ ငေးစိုက်လို့။


ဇေယျာလင်း
(၂၁ ဧပြီ၊ ၂၀၀၃)

ငှက်ကလေး

ငှက်ကလေး

လေချွန်သံကို ငှက်ကလေးက နားလည်တယ်
"ရွှီး" ဆို ပုခုံးပေါ် ရုတ်ချည်း ရောက်ရောက်လာတယ်
သူ့အတောင်ပံတွေနဲ့ လူကို ဆွဲချည်တစ်ခါ ခတ်ချည်တစ်လှည့် မြူးထူးလို့
လက်ဟန်ခြေဟန်ကို ငှက်ကလေးက သိတယ်
သူဘယ်တော့မှ ခပ်ဝေးဝေး ပျံသန်းမသွားဖူးဘူး
အဝေးက လေးလံမှုန်မှိုင်းမှုတိမ်တွေ ပြိုဆင်းလာပြန်ပြီ
နေညိုရင် ဒီလမ်းကလေးမှာ မြွေလိမ်မြွေကောက်ပုံစံ ဆိုင်ကယ်ထွက်စီးကြမယ်
ထန်းပင်တွေနဲ့အနားသတ်ထားတဲ့ လွင်ပြင်ဟိုဖက်မှာ ဘာရှိလဲ
ငှက်ကလေး မျက်လုံးတွေ ၀င့်ပြီး မေးဖူးတယ်
လေချွန်တတ်သူရဲ့ ဆံပင်ရှည်တွေကို ထိုးဆိတ် ဆွဲဖွနေရတာ နှစ်ခြိုက်တယ်
နွေဦးကိုလည်းစောင့်ကြည့်ဖူးတယ် သတိရမှုကိုလည်းပိုင်ဆိုင်ဖူးတယ်
လေချွန်တတ်သူကို ကမ္ဘာတစ်ခုလို့ ငှက်ကလေး ထင်နေတုန်းကပေါ့
တရုတ်ဆိုင်ကယ်လေးကိုယ်တိုင်မောင်းပြီး လာနေကျလမ်းကလေးအတိုင်း
နောက်တော့လည်း အဝေးပြေးကားတွေ စီးရတယ်
သွားရမယ့်ခရီးက ပို၍ ဝေးလံလာတယ်
ဧရိယာကုဒ်တွေ အမျိုးမျိုးပြောင်းပြီးခေါ်ဆိုရတယ်
မြန်မာငွေကနေ နိုင်ငံခြားငွေကို လဲလှယ်ရတယ်
ဒီလိုနဲ့ ခရီးက လေယာဉ်ပျံကြီးစီးမှ ရောက်တော့မယ်တဲ့
လမ်းတွေအကြောင်း ငှက်ကလေး ကောင်းကောင်း သိခဲ့တော့တယ်
လူတွေအများကြီးနဲ့ဆက်ဆံရတယ် တဖြည်းဖြည်းပျောက်ဆုံးလာတယ်
ဒီလို ဆုံးရှုံးစရာတွေများမယ်မှန်းသိရင် ငှက်ကလေး မပျံသန်းခဲ့ဘူး တကယ်
သူ့အတွက်တော့ သူ ထင်မထားတာတွေပဲ ဖြစ်ခဲ့တယ်
ငှက်ကလေး မပျော်တော့ဘူး
မပျော်လို့လည်း အပျော်တွေကို မွတ်မွတ်သိပ်သိပ် ရှာခဲ့တယ်
ရောက်ရာအရပ်ကနေ ငှက်ကလေး ပြန်လှည့်ကြည့်တယ်
သူထွက်လာတုန်းက ထန်းပင်တွေကို မမြင်ရတော့ဘူး
လမ်းတွေက ရှည်လျားရှုပ်ထွေးခဲ့ပြီ
တရုတ်ဆိုင်ကယ်လေးကို ငှက်ကလေး သတိရလာတယ်
လိုရာကို ထိန်းကျောင်း မောင်းနှင်ခဲ့ဖူးတယ်
ခေတ်နဲ့ လမ်းများက သူ့ကို မောင်းနှင်ခဲ့သလိုပေါ့
ဘာပဲပြောပြော အဲဒီတုန်းက လူကြီးမိဘစကားကို နားထောင်ခဲ့တယ်
ရိုးသားခြင်းဟာလည်း ငါးပါးသီလလို မြဲမြံခဲ့
အရာရာကို အရင်းအတိုင်း ရခဲ့ဖူးတယ် ရှိခဲ့ဖူးတယ်
ဒါတွေတွေးမိတော့ မျက်ရည်စို့လာတယ်
တော်ပြီ မတွေးတော့ဘူးဆိုပြီး သနပ်ခါးလေးလိမ်း
စိတ်ပြေလက်ပျောက် ဘုရားကျောင်းကန်ဖက်ထွက်လာခဲ့တယ်
ရင်ပြင်တော်ပေါ် တံမြက်စည်းလှည်းတယ်
တံမြက်စည်းလှည်းရင်း မရဘူး ငှက်ကလေး စဉ်းစားမိပြန်တယ်
ဘုရားကျောင်းဝင်းထဲက စကားပန်းပင်ကြီးအကြောင်း စဉ်းစားတယ်
ငယ်ဘ၀ စာသင်ခန်းနဲ့ လွယ်အိတ်အနီလေးအကြောင်း စဉ်းစားတယ်
စဉ်းစားရင်း သတိတွေရလာတယ် ခံစားလာရတယ်
ခံစားချက်တွေရှိသေးလည်း လေချွန်သံကြားရင်
မြစ်ဟောင်းတစ်စင်းနဲ့တူတဲ့ လူရဲ့   ပုခုံးပေါ်ကို
ငှက်ကလေး အရင်လို အပြေးပျံသန်းသွားမှာမဟုတ်တော့ဘူး။

ပိုင်မင်းဆွေ

ညောင်ညိုပင်စခန်း

တို့ရောက်တာနဲ့ အတိတ်ဟာ အုံ့ဆိုင်းတော့တာပဲ
သနပ်ခါးရနံ့လေးကအစ နိူင်ငံခြားဖြစ်ရေမွှေးနံ့အဆုံး
ထိတ်ထိတ်ပျာပျာဖြစ်ခဲ့ဖူးသမျှ မပီပြင်တော့မှုထဲ တိမ်ဝင်
ဟိုအရင် စကားပန်းတွေနဲ့ သူ့ရယ်သံ သိပ်လှ/သိပ်ရိုးသား
သူ့ဆီကကြယ်တွေ တို့ဆီ ပစ်ပစ်ပေါက်သလိုရောက်လာဖူးတယ်
အဲသလို ရောက်လာခဲ့ဖူးတာ ကျိန်တွယ်ပြောဆို ပြောပါ့မယ်
အခုတော့ သူ့အသား သူဆိတ်ကြည့်ရ
ကိုယ့်သွေးကိုယ် စမ်းကြည့်ရ
တူတူပုန်းတမ်းကစားရင်းနဲ့ နတ်ဖွက်ခံခဲ့ရပေါ့
ပုန်းနေတဲ့ ထောင့်ချိုးလေးကနေ ပျောက်သွားလိုက်တာ
လိုက်ရှာသူတွေ လက်ချည်းဗလာ ပြန်ခဲ့ရတယ်။

ပိုင်မင်းဆွေ

၂၅၊ မေ ၊၂၀၁၀

၉.၄၇ မနက်။

http://modernpoemroad.blogspot.com

ပိတောက်တွေပွင့်ပြီးမှ ပို့တဲ့ကဗျာ

ပန်းပွင့်လေးကို ပန်းအိုးထဲမှာ သတ်လိုက်ပြီး
ရွှေငါးလေးကို ရေကန်ထဲမှာ သတ်လိုက်သူ
လူသားဟာ
ဧည့်ခန်းထဲမှာ သူ့ကိုယ်သူ
ယဉ်ကျေးသူ
အလှတရားမြတ်နိုးသူအဖြစ် သတ်လိုက်ပြီ။

ငါ့ကဗျာတွေ
စာမျက်နှာပေါ်မှာ
ပါဖို့ ကြိုးစားခဲ့သလို။

သုခမိန်လှိုင်

ကုန်သည်

တစ်နေ့
ပင်လယ်ဟာ ကုန်းပေါ်တက်လာပြီး
လူ ပန်းပွင့် ကျွဲနွား တဲစု တိုက်တာ ရယ်သံ
သစ်ပင် ကလေးငယ် မျက်ရည် မိသားစု
ကုန်ဈေးနှုန်း လယ်ကွင်း ကျေးငှက် သီချင်းသံ
အဖွားအို စေတီ စပါးကျီနဲ့ ခြံစည်းရိုးများကို
ငိုသံနဲ့လဲလှယ်တယ်။


img source

___________________________________________________________________

ပိုင်မင်းဆွေ

7.5.2010
9:22 PM.

သီတင်းကျွတ်

ရွှေလ ဘုရားအရိပ်ထဲ ဖိတ်ကျ
သူ့အရိပ် ကိုယ့်အရိပ်ထဲ ဖိတ်ကျ
ဆီမီး နဲ့ မီးရှူးတွေ ပြန်သွားပြီ
စက္ကူမီးပုံးကားလေး
အမွှေးတိုင်ရနံ့တွေကြား စတီယာရင်ထိန်းရင်း
လူတွေကို ပို့ပြီး ပြန်လာပြီ
အနမ်းတွေကို သိမ်းကြစို့
ညဥ့်နက်လှပြီ ပြန်ရအောင်။

ပိုင်မင်းဆွေ