လယ်ကန်သင်းရိုးပေါ် လေချွန် လမ်းလျှောက်
မြက်ခင်းနဲ့ မြေသားကို ကိုင်တွယ်စမ်းသပ်ကြည့်
ကျွဲတွေကြားထဲ ရွှံ့ရေ ၀င်လူး
ကမ္ဘာမြေဟာ တယ် အရသာရှိပါလား

Pages

Tuesday, October 12, 2010

ငါ့ညီမလေး လွှတ်တဲ့ မီးပုံး (နေမွန်းသင်)

photo:Internet




















ငါ့ညီမလေး လွှတ်တဲ့ မီးပုံး

သီတင်းကျွတ်ပြီ
မလွတ်မြောက်မှုတွေ ကိုယ်စီချိတ်ဆွဲပြီး
မီးပုံးပျံလွှတ်ရအောင်။

ညီမလေးရေ
ငါ့ဝိညာဉ်ကို ရေနံလောင်းပါ
ငြီးငွေ့မှုနဲ့ အားပါးတရလောင်ကျွမ်းရင်း
အခိုးအငွေ့အဖြစ်
နင့်လက်နဲ့ ယက်လုပ်ထားတဲ့ မီးပုံးလေးမှာ
ယီးလေးခို လိုက်ပါသွားရစေ
ကမ္ဘာမြေဟာ
သွေးညှီအနံ့တွေနဲ့ မွန်းကျပ်နေခဲ့ပြီမဟုတ်လား။

အဝေးကြီးကနေ
ငါ့ကိုမျှော်လင့်မနေပါနဲ့တော့
အနာတရတွေအကြား အရေခွံထူလာတဲ့သူမို့
အိမ်ပြန်လမ်းတွေ ၀ိုးတ၀ါး
နင့်စာသင်ခန်းလေးပဲ နင်ဂရုစိုက်ပါ။

နာကျင်မှုတွေ ကိုယ်စီပွေ့ရင်း
ငါတို့လျှောက်ခဲ့တဲ့လမ်းကလေး ခြောက်သွေ့ပေမယ့်
မဟောင်းနွမ်းသေးဘူး
ခရီးပမ်းပေမယ့် အရောင်မလွင့်သေးဘူး
အခုလိုလပြည့်ညတွေမှာ
ပြန်မဆုံနိူင်တဲ့မိသားစုတွေရဲ့ ကိုယ်စား
ရဲရဲဝံ့ လမ်းထွင်သူတွေရဲ့ကိုယ်စား
ရင်ပြင်တော်အပြည့် ဆီမီးလှူခဲ့ပါ။

သီတင်းကျွတ်ပြီ
ကောင်းကင်ပြင်တဆုံး
အနှောင်ဖွဲ့မဲ့ ပျံသန်းနေတဲ့ မီးပုံးတွေပဲငေးရင်း
ဘ၀ရဲ့ မပြေနိူင်တဲ့အမောတွေကို
ဒီလိုချရေးမိတယ်
ဘယ်တော့များ ဘ၀ကို ဘ၀လို
ညီမလေးလွှတ်တဲ့ မီးပုံးလေးမှာ ယီးလေးခိုခွင့်ရပါ့မလဲ… ။ ။


နေမွန်းသင်

-ညီမလေးရဲ့မွေးနေ့ အမှတ်တရ
(၂၄-၁၀-၀၇)



Note

မြန်မာကဗျာဘလော့/စာမျက်နှာတွေ ယနေ့လိုများများစားစား မရှိခင်က ခင်မင်ခဲ့တဲ့
ကဗျာဆရာ နေမွန်းသင်ရဲ့ ကဗျာလေးကို တင်လိုက်ပါတယ်။ သီတင်းကျွတ်တော့မယ်လေ။
ပိုင်မင်းဆွေ

Saturday, October 2, 2010

လွမ်းစေတီ

သစ်ရွက်ခြောက်ရှို့မီးထဲ
လေလွင့်ဆုတောင်းများ မယုံနိူင်ပြီ
ချင်းတွင်းမြစ်က မမြဲခြင်းတရားကို ညည်းတွားလို့
လယ်ကွင်းကို ဖြတ်တိုက်လာတဲ့ လေအား
ကမူနဲ့ ထန်းပင်တွေက သပ်တင်တီးခတ်လို့
ခေါင်းလောင်းသံနဲ့ ထီးရိပ်မှာ အေးရာအေးကြောင်း
စိတ်ရူးတွေ ရပ်တန့်ရာ ရပ်တန့်ကြောင်း
ဆူးခြစ်ရာ လမ်းကြောင်းလေးအတိုင်း
သီးခြားတောင်ကုန်းလေးပေါ် ကုပ်တွယ်တက်ခဲ့ရာ
လမ်းတလျောက်
ကင်မရာမြင်ကွင်းထဲ ဖမ်းလို့မမိတဲ့
ရနံ့ နဲ့ အသံ
ဆန့်တန်းထားတဲ့ အစွဲအလန်းများ
တဖျပ်ဖျပ် တချပ်ချပ်
သတိရခြင်းမီးပွင့်တွေ ကုန်အောင်ထိရိုက်
ဇာတ်နာသူကြီး မျက်ဝန်းသားများ မို့အစ်
နောင်ဘ၀ဆိုတာ ရှိခဲ့လည်း
သံတွေကို မီးနဲ့ မပြုပြင်လိုတော့ဘူး
အပြန်လမ်းမှာ ဓါးတွေ ထိုးအန်ခဲ့တယ်။

ပိုင်မင်းဆွေ
( ၁ စက်တင်ဘာ ၂၀၁၀)
၁၁ နာရီ ၃၀ မိနစ်။
လမ်းကြား ၁/၂ ကဗျာစာအုပ်။