သူမရဲ့ လိမ္မော်ရောင် ထီးရှည်

img internet
photo retouching by minswe


သူမရဲ့ လိမ္မော်ရောင် ထီးရှည်

သူမရဲ့ လိမ္မော်ရောင်ထီးဟာ
အချစ်စိတ်ရဲ့ သင်္ကေတလို့
ကျွန်တော့်ကို ဘယ်သူပြောလဲ
(ဘယ်သူမှမပြောပေမယ့်)

မိုးဒဏ်နဲ့နေဒဏ်ကို အလုံအလောက်အကာအကွယ်ပေးနိုင်တဲ့
ထီးရွက်နဲ့ ကြံ့ခိုင်တဲ့ ကိုင်းတွေရှိတယ်။

လူတွေကို မှုန်မှုန်လေး မြင်ရတဲ့နေရာကနေ ကြည့်ရင်
ဒါဟာ သူမ ပဲလို့
သူမရဲ့ လိမ္မော်ရောင်ထီးက ပြောပြတယ်။

ထီးဆိုတာ မိုးနေ ကာကွယ်ဖို့လို့
ရိုးရိုးသားသား အတွေးအခေါ်နဲ့ ကျွန်တော်ဟာ
သူမနဲ့ သူမရဲ့ လိမ္မော်ရောင်ထီးကို
သာမာန်ထက် ပိုမတွေးခဲ့။

နေပူပြင်းတဲ့နေ့တွေမှာ
လိမ္မော်ရောင်ထီးဟာ သူမ အပြုံးတွေကို
ကာကွယ်ပေးသူ
သည်းထန်တဲ့မိုးစက်တွေကြားက
သူမကို လုံအောင် ဖုံးထားသူ
သူမဟာ ထီးကို သူရဲကောင်းတစ်ယောက်လို
ထင်မှတ်သုံးစွဲနေပုံမျိုးနဲ့
ခံယူ ရင်ကော့ရင်း
လိမ္မော်ရောင်ထီးဟာ မာနကြီးသူပေါ့။

လိမ္မော်ရောင်ထီးဟာ ကျွန်တော့်အတွက်တော့ သူ့မှာ
နေရာမရှိပါဘူးဆိုတဲ့ မျက်နှာပေးနဲ့
နှုတ်ခမ်းကို တင်းတင်းစေ့ရင်း ဖြတ်လျှောက်သွားတဲ့အခါ
ဒါဟာ သူမလား သူမရဲ့ လိမ္မော်ရောင်ထီးလားလို့
ဝေခွဲမရအောင် တစ်သွေးတည်း တစ်သံတည်း ရှိခဲ့တယ်။

သူမဟာ အဲဒီထီးကို ဆောင်းပြီး
သူမရဲ့ချစ်သူနဲ့ အနမ်းမိုး စွေရင် စွေခဲ့ဖူးမယ်
( နေမပူလည်း ထီးဆောင်းကာ ဆိုတဲ့သီချင်းလိုပေါ့ )
မိုးရေထဲမှာ လျှောက်လည်ရင် လည်ခဲ့ဖူးမယ်
(အဲဒီအချိန် သူမရဲ့မျက်နှာလေးဟာ ဘယ်လို ရှိနေမလဲ )
ကျွန်တော့်အတွက်တော့ ဒါဟာ
အနှေးပြကွက် အက်ရှင်တစ်ခုလို ခံယူ လက်ခံရင်း
အဝေးကသာ ငေးမောနေရုံပေါ့။

သူမဟာ လိမ္မော်ရောင်ထီးကို
ဖက်ရှင်တစ်ခုလို သုံးစွဲခဲ့တာ ဆိုရင်တော့
တစ်ချိန်မှာ ဒီဇိုင်းအသစ် အခြားအရောင်တစ်မျိုးမျိုးရှိတဲ့ ထီးအသစ်ကို
ပြောင်းလဲ သုံးစွဲ လိမ့်မယ်
အဲဒီအခါကျမှ လိမ္မော်ရောင်ထီးကို
ကျွန်တော် ပြောချင်ပါတယ်
လိမ္မော်ရောင်ထီးရေ ...... မင်း သိပြီလားလို့
အခု ခံစားချက်ဆိုတဲ့ စကားလုံးရဲ့ အတိမ်အနက်ကို
မင်း နားလည်ပြီ မို့လားလို့
မေးချင်ပါတယ်
အဲဒီအခါ ချောင်ထိုးခံထားရတဲ့ လိမ္မော်ရောင်ထီးဟောင်းလေးက
ဘာပြန်ပြောလိမ့်မလဲ ဆိုတာကို
ကျွန်တော်ဟာ တွေးကြည့်ရင်း စဉ်းစားနေမိတယ်။

ပိုင်မင်းဆွေ

၂၄.၁၀.၂၀၀၇
၁ နာရီ ၅၅ မိနစ် ။

..............................................................................